new tai | old tai | 中文 | English | Thai

ᦷᦢ ᦟᦱᧃ ᦅᧄ ᦉᦸᧃ

作者: 时间:2018-06-07 18:20:10

  ᦅᧃ ᦵᦣᧆ ᦺᦣᧈ ᦠᦹᧉ ᦃᧅ ᦺᦋᧉ ᦂᦱ,

  ᦅᧃ ᦵᦣᧆ ᦓᦱ ᦠᦹᧉ ᦃᧅ ᦺᦋᧉ ᦓᧄᧉ;

  ᦅᧃ ᦓᧄᧉ ᦣᦴᧉ ᦢᧁᧈ ᦜᦻ ᦠᦹᧉ ᦠᦱ ᦆᦴ,

  ᦅᧃ ᦉᦱᧂᧉ ᦋᦴᧉ ᦠᦹᧉ ᦃᧅ  ᦺᦋ ᦅᧄ;

  ᦅᧃ ᦙᦲ ᦃᦸᧂ ᦟᧄ ᦊᦱᧈ ᦀᧁ ᦺᦞᧉ ᦆᦱᧇ ᦐᦱᧉ

  ᦅᧃ ᦘᦱᧉ ᦢᧁᧈ ᦂᦱᧉ ᦠᦹᧉ ᦟᧇ ᦆᦳᧄ ᦕᦻ;

  ᦅᧃ ᦵᦞᧅ ᦂᦱᧃ ᦜᦻ ᦺᦡᧉ ᦟᦳᧅ ᦋᧁᧉ,

  ᦅᧃ ᦂᦲᧃ ᦃᧁᧉ ᧟ ᦊᦱᧈ ᦘᦱᧁᧉ ᦓᦸᧃ ᦜᧇ;

  ᦅᧃ ᦔᦲᧃ ᦋᦱᧂᧈ ᦃᧇ ᦺᦡᧉ ᦠᦱ ᦵᦣᧃ ᦣᦴᧉ,

  ᦅᧃ ᦋᦱᧂᧈ ᦀᦴᧉ ᦵᦗᦲᧃᧈ ᦠᦳᧄ ᦝᧂ;

  ᦅᧃ ᦃᦲᧉ ᦎᧂ ᦟᦴᧅ ᦜᦱᧃ ᦆᦱᧉ,

  ᦅᧃ ᦵᦟᧂᧉ ᦙᦱᧉ ᦺᦡᧉ ᦣᦴᧉ ᦈᧅ ᦊᦱᧉ;

  ᦅᧃ ᦵᦟᧂᧉ ᦔᦱ ᦺᦡᧉ ᦵᦵᦔᧂ ᦐᦸᧂ ᦦᦱᧂᧉ,

  ᦅᧃ ᦵᦣᧆ ᦉᦱᧂᧉ ᦠᦹᧉ ᦵᦵᦔᧂ ᦺᦈ ᦛᦱᧃ;

  ᦅᧃ ᦣᧁ ᦡᦲ ᦂᦲᧃ ᦑᦱᧃ ᦠᦹᧉ ᦵᦣᧆ ᦺᦈ ᦌᦹᧈ,

  ᦅᧃ ᦌᦹᧉ ᦵᦜᧅ ᦺᦡᧉ ᦌᦹᧉ ᦁᧃ ᦺᦊᧈ;

  ᦅᧃ ᦌᦹᧉ ᦺᦂᧈ ᦺᦡᧉ ᦀᧁ ᦷᦎ ᦓᦾᧉ,

  ᦅᧃ ᦔᦳᧅᧈ ᦀᦾᧉ ᦺᦡᧉ ᦠᦱ ᦷᦉᧃ ᦌᦻ;

  ᦅᧃ ᦔᦲᧃ ᦓᦻ ᦺᦡᧉ ᦠᦱ ᦵᦣᧃ ᦣᦴᧉ,

  ᦅᧃ ᦙᦲ ᦋᦴᧉ ᦊᦱᧈ ᦵᦣᧆ ᦜᦻ ᦺᦈ;

  ᦅᧃ ᦔᦲᧃ ᦺᦘᧈ ᦠᦹᧉ ᦃᧅ ᦵᦣᧆ ᦉᦱᧂᧉ,

  ᦅᧃ ᦔᦲᧃ ᦓᦱᧂ ᦉᦱᧁ ᦠᦹᧉ ᦋᦱᧂᧈ ᦔᦱᧅ;

  ᦅᧃ ᦔᦲᧃ ᦃᦸᧂ ᦚᦱᧅ ᦊᦱᧈ ᦟᧅ ᦂᦲᧃ,

  ᦅᧃ ᦔᦲᧃ ᦃᦸᧂ ᦖᦲᧃ ᦊᦱᧈ ᦀᧁ ᦙᦱ ᦺᦂᧉ;

  ᦅᧃ  ᦔᦲᧃ ᦺᦃᧉ ᦠᦹᧉ ᦷᦊᧅ ᦊᦱ,

  ᦅᧃ ᦔᦲᧃ  ᦘᦰ ᦠᦹᧉ ᦏᦹ ᦉᦲᧃ ᦒᧄ;

  ᦅᧃ ᦓᧄᧉ ᦜᦻ ᦊᦱᧈ ᦺᦔ ᦟᦾ,

  ᦅᧃ ᦡᦾ ᦉᦳᧂ ᦊᦱᧈ ᦗᦱ ᦷᦆ ᦐᧅ;

  ᦅᧃ ᦙᧅ ᦵᦵᦑᧉ ᦅᦾᧈ ᦺᦔ ᦉᦴᧈ,

  ᦅᧃ ᦊᦴᧈ ᦡᦻ  ᦑᦸᧂᧉ ᦋᦱᧂᧈ ᦔᧁᧈ;

  ᦅᧃ  ᦺᦔ ᦵᦏᦲᧃᧈ ᦠᦹᧉ ᦺᦡᧉ ᦵᦓᦲᧉ,

  ᦅᧃ ᦵᦙᦲ ᦑᦱᧈ ᦠᦹᧉ ᦺᦡᧉ ᦔᦱ;

  ᦅᧃ ᦵᦙᦲᧈ ᦔᦲᧃ ᦘᦰ ᦠᦹᧉ ᦋᦱᧂᧈ ᦵᦑᧆ ᦒᧄ,

  ᦅᧃ ᦙᦲ ᦅᧄ ᦅᦸᧉ ᦠᦹᧉ ᦔᦱᧅ ᦵᦉᧂᧉ;

  ᦅᧃ ᦵᦟᧂᧉ ᦉᦲᧂᧈ ᦃᦸᧂ ᦠᦹᧉ ᦷᦔ ᦡᦲ,

  ᦅᧃ ᦙᦲ ᦵᦉᧁᧈ ᦜᦻ ᦠᦹᧉ ᦺᦈ ᦦᦱᧂᧉ;

  ᦅᧃ ᦉᦱᧂᧉ ᦋᦴᧉ ᦜᦻ ᦋᦱᧂᧈ ᦢᧁᧈ ᦔᦲᧃ ᦵᦣᦲᧃ,

  ᦅᧃ ᦔᦲ ᦵᦡᦲᧃ ᦡᦲ ᦠᦹᧉ ᦔᦳᧅᧈ ᦉᦱᧂᧉ   ᦋᧁᧉ;

  ᦅᧃ  ᦣᧁ ᦏᧁᧉ ᦙᦱ ᧟ ᦺᦡᧉ ᦕᦸᧃᧈ ᦁᦱ ᦈᦲᧃ,

  ᦅᧃ ᦣᧅ ᦉᦱ ᦉᦲᧃ ᦠᦹᧉ ᦺᦈ ᦐᦲᧄ;

  ᦅᧃ ᦵᦵᦑᧂ ᦃᦲᧄ ᦠᦹᧉ ᦵᦵᦙᧃᧈ ᦘᦰᦍᦱᧆ,

  ᦅᧃ ᦔᦲᧃ  ᦈᧁᧉ ᦁᦳᧂ ᦀᦱᧆ ᦠᦹᧉ ᦌᦹᧈ ᦺᦉ;

  ᦅᧃ ᦺᦔ ᦑᦲᧈ ᦺᦐ ᦠᦹᧉ ᦵᦗᦲᧃᧈ ᦣᦴᧉ,

  ᦅᧃ ᦃᦲᧉ ᦀᦴᧉ ᦵᦗᦲᧃᧈ ᦋᦱᧂᧈ ᦋᧂ;

  ᦅᧃ ᦓᧂᧈ ᦺᦐ ᦅᦸᧉ ᦠᦹᧉ ᦙᦲ ᦵᦗᧃ,

  ᦅᧃ ᦵᦞᧃ ᦙᦱ ᦆᦸᧇ ᦊᦱᧈ ᦵᦵᦟᧃᧈ ᦐᦲ。

(ᦗᦸᧈ ᦆᧄ ᦎᦳᧃ)