new tai | old tai | 中文

ᦵᦙᦲᧂ ᦟᦱᧉ ᦶᦉᧃᧈ:“ᦔᦲᧃᧈ ᦊᦱᧈ ᧕ ᦵᦋᦲᧉ”ᦃᧆ ᦎᦸᧈ ᦝᦱᧉ ᦶᦟᧂᧉ ᦶᦠᧂᧉ ᦃᦱᧃᧈ ᦠᦹᧉ ᦡᦲ

作者: 时间:2020-04-24 10:23:00

  ᦃᧁᧉ ᦷᦛᧂᧈ ᦓᦲᦰ ᦙᦱ,ᦵᦟᦲᧂᧈ ᦂᦱᧃ ᦝᦱᧉ ᦶᦟᧂᧉ ᦶᦠᧂᧉ ᦃᦱᧃᧈ ᦵᦙᦲᧂ ᦟᦱᧉ ᦶᦉᧃᧈ ᦋᦱᧆ ᦐᧅ ᦐᦱ, ᦓᧄᧉ ᦐᦸᧂ ᦃᧂ ᦓᧄᧉ ᦕᦸᧃᧈ ᦓᦾᧉ ᦺᦔ、ᦋᦳᧄ ᦜᦻ ᦺᦋᧉ ᦊᦳᧂᧈ ᦡᦾᧉ ᦂᦲᧃ ᦓᧄᧉ ᦋᦱᧆ ᦟᧄᧉ ᦢᦱᧅ。 ᦎᦲᧆ ᦎᦸᧈ ᦵᦟᦲᧂᧈ ᦂᦱᧃ ᦓᦲᦰ, ᦷᦣᧂ ᦋᦲᧉ ᦓᧄ ᦃᧆ ᦎᦸᧈ ᦝᦱᧉ ᦶᦟᧂᧉ ᦶᦠᧂᧉ ᦃᦱᧃᧈ ᦝᦱᧂᧉ ᦓᧄᧉ ᦷᦏᧄᧉ ᦓᧄᧉ ᦓᦸᧂ ᦺᦓ ᦶᦉᧃᧈ、 ᦷᦣᧂ ᦂᦱᧃ ᦉᦲᧃᧉ ᦓᧄᧉ ᦉᦻ ᦵᦖᦲᧂ ᦺᦓ ᦶᦉᧃᧈ ᦃᧅ ᦖᧃᧈ ᦔᧆ ᦀᧁ ᦂᧄᧈ ᦟᧂ,ᦺᦋᧉ ᦔᦲᧃᧈ ᦊᦱᧈ ᦜᦻ ᦵᦋᦲᧉ ᦜᦻ ᦋᦸᧂᧈ ᦍᧇ ᦖᧃᧉ ᦂᦱᧃ ᦃᧆ ᦎᦸᧈ ᦝᦱᧉ ᦶᦟᧂᧉ ᦶᦠᧂᧉ ᦃᦱᧃᧈ, ᦀᦸᧅᧈ ᦶᦣᧂ ᦅᦻ ᦵᦋᧉ ᦃᦸᧉ ᦂᦱᧃ ᦋᦳᧄ ᦜᦻ ᦺᦋᧉ ᦊᦳᧂᧈ ᦡᦾᧉ ᦂᦲᧃ ᦓᧄᧉ。

  ᦆᧄ ᦑᦸᧂᦰ ᦔᦲᧃ ᦋᦸᧂᧈ ᦂᦱᧃ, ᦶᦢᧂᧈ ᦔᦲᧃ ᦙ ᦷᦍ ᦋᦲᧉ ᦓᧄ。 ᦆᦸᧂᧉ ᦔᦱᧃᧈ ᦂᦱᧃ ᦷᦣᧂ ᦋᦲᧉ ᦓᧄ ᦃᧆ ᦎᦸᧈ ᦝᦱᧉ ᦶᦟᧂᧉ ᦶᦠᧂᧉ ᦃᦱᧃᧈ ᦝᦱᧂᧉ ᦓᧄᧉ ᦷᦏᧄᧉ ᦓᧄᧉ ᦓᦸᧂ ᦺᦓ ᦶᦉᧃᧈ ᦋᦳ ᦘᦸᧄᧉ ᦉᦲᧂ ᦷᦈ ᦆᧄ ᦑᦸᧂᦰ ᦵᦟᦲᧂᧈ ᦂᦱᧃ ᦝᦱᧉ ᦶᦟᧂᧉ ᦶᦠᧂᧉ ᦃᦱᧃᧈ ᦡᦽᧉ ᦣᦲᧇ, ᦎᦲᧆ ᦡᦽᧉ ᦋᦸᧂᧈ ᦂᦱᧃ ᦅᦳᧂᧈ ᦓᧄᧉ ᦑᧂ ᦶᦉᧃᧈ ᦶᦢᧂᧈ ᦔᦲᧃ ᦙ ᦷᦍ ᦋᦲᧉ ᦓᧄ。 ᦎᦲᧆ ᦎᦸᧈ ᦐᦸᧂ ᦃᧂ ᦓᧄᧉ ᧗ ᦐᦽ ᦔᧅ ᦎᦲᧃᧈ ᦘ ᦑᦲᧆ ᦓᦱ ᦑᦲ ᦏᦲ ᦏᦸ ᦅᦳᧂᧈ ᦓᧄᧉ “ᦐᦽᧈ ᧑ ᦣᦲᧆ ᧑”, ᦁᦱ ᦙ ᦃᦱᧄᧈ ᦖᧃᧉ ᦞᦹᧃ ᦅᦳᧂᧈ ᦓᧄᧉ; ᦓᦸᧅ ᦵᦉ ᦓᦲᦰ ᦢᦱᧃᧉ ᦷᦃᧂᧈ ᦁᧃ ᦢᧁᧈ ᦺᦋᧈ ᦔᦲᧃ ᦐᦸᧂ ᦃᧂ ᦓᧄᧉ ᦅᦳᧂᧈ ᦓᧄᧉ ᦓᧃᧉ ᦃᧁᧉ ᦵᦣᧆ ᦓᦱ ᦑᦲ ᦅᦳᧂᧈ ᦓᧄᧉ“ᦢᦱᧃᧉ ᧑ ᦣᦲᧆ ᧑”, ᦷᦔ ᦨᦱᧃ ᦋᦸᧇ ᦡᦲ, ᦈᦹ ᦛᧂ ᦠᦹᧉ ᦁᦱ ᦑᦲᧆ ᦺᦐ ᦞᧃ ᦉᦳᧅ ᦷᦎᧅ ᦉᦸᧃᧈ ᦢᦸᧅᧈ ᦔᦱᧁᧈ ᦵᦟᦲᧂᧈ ᦂᦱᧃ ᦺᦋᧉ ᦊᦳᧂᧈ  ᦡᦾᧉ ᦂᦲᧃ ᦓᧄᧉ ᦍᦱᧅ、 ᦵᦟᦲᧂᧈ ᦂᦱᧃ ᦐᦸᧂ ᦃᧂ ᦓᧄᧉ、 ᦂᦱᧃ ᦺᦣᧈ ᦓᦱ ᦔᦲᧃ ᦵᦘ ᦺᦘ、 ᦵᦟᦲᧂᧈ ᦂᦱᧃ ᦵᦣᧆ ᦉᦱᧂᧉ ᦃᦸᧉ ᦊᦴᧈ ᦣᦱᧁ ᦂᦲᧃ ᦎᦱᧄ ᦷᦎ ᦵᦡᧁ ᦷᦕᧆᧈ ᦷᦎ ᦵᦡᧁ ᦚᦳᧂ ᦓᦲᦰ。 ᦃᦸᧉ ᦂᦱᧃ ᦗᦻ ᦢᦱᧃᧉ ᦑᦳᧂᧈ ᦅᦳᧃ ᦺᦋᧈ ᦊᦳᧂᧈ ᦡᦾᧉ ᦂᦲᧃ ᦓᧄᧉ ᦟᧄᧉ ᦢᦱᧅ ᦓᧃᧉ ᦓᧇ ᦎᦱᧄ ᦘ ᦑᦲᧆ ᦐᧅ ᦢᧁ ᦂᦲᧉ ᦅᦲᧃ ᦵᦋᦲᧂᧉ ᦓᦱᧃ, ᦵᦵᦢᧂᧈ ᦔᦲᧃ  ᦙ ᦷᦍ ᦃᧁᧉ ᦵᦣᧆ, ᦑᦲᧈ ᦐᧅ ᦅᦻ ᦵᦋᧉ ᦃᦸᧉ ᦂᦱᧃ ᦺᦋᧉ ᦊᦳᧂᧈ ᦡᦾᧉ ᦂᦲᧃ ᦓᧄᧉ ᦟᧄᧉ ᦢᦱᧅ ᦠᦹᧉ ᦋᦳᧄ ᦜᦻ ᦗᦸ ᦡᦻ ᦵᦃᧄ ᦓᧄᧉ ᦓᧃᧉ, ᦗᦻ ᦟᦳᧃ ᦓᧇ ᦎᦱᧄ ᦵᦟᦲᧂᧈ ᦵᦔᦲᧂ ᦶᦃᧃᧉ ᦵᦞ ᦟᦱ ᦅᦳᧂᧈ ᦓᧄᧉ ᦠᦹᧉ ᦋᦳᧄ ᦜᦻ。

  ᦶᦢᧂᧈ ᦔᦲᧃ ᦟ ᦶᦩᧃᧈ ᦠᦱᧇ ᦒᦱᧄ ᦂᦱᧃ, ᦶᦋᧆ ᦑᦲᧈ ᦣᦴᧉ ᦶᦈᧂᧉ ᦵᦟᦲᧂᧈ ᦂᦱᧃ。 ᦆᦸᧂᧉ ᦔᦱᧃᧈ ᦂᦱᧃ ᦷᦣᧂ ᦋᦲᧉ ᦓᧄ ᦃᧆ ᦎᦸᧈ ᦝᦱᧉ ᦶᦟᧂᧉ ᦶᦠᧂᧉ ᦃᦱᧃᧈ ᦝᦱᧂᧉ ᦓᧄᧉ ᦷᦏᧄᧉ ᦓᧄᧉ ᦓᦸᧂ ᦺᦓ ᦶᦉᧃᧈ ᧞ ᦷᦣᧂ ᦂᦱᧃ ᦉᦲᧃᧉ ᦓᧄᧉ ᦉᦻ ᦵᦖᦲᧂ ᦺᦓ ᦵᦵᦉᧃᧈ ᦎᧂᧉ ᦔᦲᧃ ᧔ ᦖᦴᧈ ᦀᧁ ᦑᦱᧂ ᦶᦍᧃᧉ ᦕᦴᧉ ᦂᦸᧃᧈ ᦀᦸᧃ ᦔᦲᧃ ᦋᦴ ᦋᦱᧂ ᦃᧆ ᦎᦸᧈ ᦝᦱᧉ ᦶᦟᧂᧉ ᦶᦠᧂᧉ ᦃᦱᧃᧈ, ᦎᦲᧆ ᦡᦽᧉ ᧘ ᦵᦈᦲᧃᧈ ᧒ ᦶᦌᧂᧈ、 ᦓᦳᧂᧉ ᦌᦱᧂ ᧔ ᦑᦲᧈ ᦶᦢᧂᧈ ᦔᦲᧃ ᦶᦕᧃᧉ ᦔᦲᧃ ᦑᦲᧈ ᦠᦱᧇ ᦒᦱᧄ ᦂᦱᧃ, ᦀᧁ ᦺᦈ ᦺᦉᧈ ᦑᦽ ᦋᦸᧄ ᦵᦟᦲᧂᧈ ᦂᦱᧃ ᦅᦳᧃ ᦺᦋᧉ ᦊᦳᧂᧈ ᦡᦾᧉ ᦂᦲᧃ ᦓᧄᧉ ᦊᦱᧇ ᦍᦱᧅ, ᦶᦋᧆ ᦑᦸᧂᦰ ᦵᦟᦲᧂᧈ ᦂᦱᧃ ᦓᦱ ᦑᦲ “ᦢᦱᧃᧉ ᧑ ᦣᦲᧆ ᧑” ᦷᦎᧅ ᦑᦱᧂᧉ ᦔᦲᧃ ᦡᦲ, ᦗᦸᧂᦰ ᦑᧂ ᦷᦙᧃ ᦌᦱᧉ ᦶᦋᧆ ᧙᧐ ᦑᦲᧈ ᦔᦻ, ᦕᦸᧇ ᦈᦸᧆᧈ ᦏᦹᧂ ᦌᦳᧃᧈ ᦋᦴ、 ᦓᦳᧂᧉ ᦌᦱᧂ ᦵᦝᦲᧃᧈ ᦌᦱᧂ、 ᦋᦲᧈ ᦙᦲᧃᧉ ᦶᦑᧃ、 ᦅᦳᧂᧈ ᦌᦱᧂ ᦺᦓ ᦢᦱᧃᧉ ᦷᦃᧂᧈ, ᦣᦴᧉ ᦶᦈᧂᧉ ᦂᧄ ᦑᦹ ᦵᦟᦲᧂᧈ ᦂᦱᧃ ᦺᦋᧉ ᦊᦳᧂᧈ ᦡᦾᧉ ᦂᦲᧃ ᦓᧄᧉ ᦺᦘᧈ ᦵᦙᦲᧂ ᦑᧂ ᦶᦉᧃᧈ, ᦵᦗᦲᧈ ᦎᦱᧄ ᦞᦲᧉ ᦌᦱ ᦆᧄ ᦑᦸᧂᦰ、 ᦔᧅ ᦎᦲᧃᧈ ᦔᦲᧃᧈ ᦊᦱᧈ ᦃᧆ ᦎᦸᧈ ᦝᦱᧉ ᦶᦟᧂᧉ ᦶᦠᧂᧉ ᦃᦱᧃᧈ ᦅᦳᧂᧈ ᦂᦱᧃ ᦞᦲᧉ ᦌᦱ ᦔᦲᧃ ᦡᦲ。

  ᦠᦱᧂᧉ ᦆᦱᧆ ᦂᦱᧅ ᦂᦱᧃ, ᦷᦎᧅ ᦑᦲᧈ ᦋᦸᧂᧈ ᦂᦱᧃ 。 ᦺᦎᧈ ᦎᦱᧄ ᦶᦋᧆ ᦑᦸᧂᦰ , ᦋᦳ ᦓᦳᧄ ᦕᦴᧉ ᦞᦲᧉ ᦌᦱ ᦋᦸᧂᧈ ᦂᦱᧃ ᦠᦱᧂᧉ ᦆᦱᧆ ᦂᦱᧅ ᦂᦱᧃ ᦅᦹᧆ ᦵᦣᧆ ᦎᦱᧄ ᦋᦸᧂᧈ ᦂᦱᧃ ᦅᦳᧃ ᦢᦱᧃᧉ ᦑᦳᧂᧈ ᦵᦙᦲᧂ ᦟᦱᧉ ᦶᦉᧃᧈ ᦺᦋᧉ ᦓᧄᧉ ᦡᦾᧉ ᦂᦲᧃ ᦓᧄᧉ ᦔᦸᧆᧈ ᦺᦘ ᦷᦎᧅ ᦑᦲᧈ,ᦀᧁ ᦃᧁᧉ ᦂᧇ ᦵᦍ ᦋᦸᧂᧈ ᦂᦱᧃ ᦙᦲ ᦇᦹᧃ ᦑᦹᧃ ᦎᦲᧆ ᦗᦱᧄ ᦢᦱᧃᧉ ᦑᦳᧂᧈ ᦵᦵᦎᧂᧈ ᦵᦵᦙ ᦓᧃᧉ。 ᦷᦣᧂ ᦂᦱᧃ ᦉᦲᧃᧉ ᦓᧄᧉ ᦉᦻ ᦵᦖᦲᧂ ᦺᦓ ᦶᦉᧃᧈ ᦍᦸᦰ ᦓᧄ ᦞᦲᧉ ᦌᦱ ᦡᦲ ᦺᦓ ᦵᦌᦲᧃ ᦙᦱ ᦃᦳᧆ ᦓᧄᧉ ᦢᦸᧈ, ᦋᦲᧂ ᦀᧁ ᦵᦞ ᦟᦱ ᦎᦸᧈ ᦂᦱᧃ ᦝᦱᧉ ᦶᦟᧂᧉ ᦶᦠᧂᧉ ᦃᦱᧃᧈ, ᦵᦞ ᦟᦱ ᧗ ᦞᧃ ᦢᧁᧈ ᦡᦻ ᦅᦸᧉ ᦗᦸ ᦃᦳᧆ ᦓᧄᧉ ᦢᦸᧈ ᦺᦡᧉ ᧓ ᦢᦸᧈ。 ᦵᦙᦲᧈ ᦷᦡᧃᧈ, ᦃᦳᧆ ᦓᧄᧉ ᦢᦸᧈ ᧟ ᧗ ᦢᦸᧈ, ᦓᧄᧉ ᦵᦟᦲᧅ ᧙ ᦣᦾᧉ ᧒᧐ ᦙᦲ, ᦺᦋᧉ ᦊᦳᧂᧈ ᦉ ᦵᦖᦲ ᧖ ᦢᦸᧈ。ᦋᦸᧂᧈ ᦂᦱᧃ ᦂᦲᧉ ᦅᦲᧃ ᦃᧆ ᦎᦸᧈ ᦝᦱᧉ ᦶᦟᧂᧉ ᦶᦠᧂᧈ ᦃᦱᧃᧈ ᦟᦴᧈ ᦒᦲ ᧑ ᦁᧃ ᦷᦢᧄ ᦓᧄᧉ、 ᦑᦸᧈ ᦓᧄᧉ、 ᦷᦢᧄ ᦏᦰ ᦜᦸᧂ ᦓᧄᧉ ᦗᦸ ᦡᦻ ᦶᦈᧅᧈ ᦛᦻ ᦖᦴᧈ ᦒᦱᧄ ᦵᦞᧅ ᦂᦱᧃ ᧓ ᦖᦴᧈ ᦃᧁᧉ ᦵᦣᧆ。

  ᦑᦸᧂᦰ ᦎᦱᧄ ᦂᦱᧃ ᦵᦙᦲᧈ ᦷᦡᧃᧈ, ᦆᧄ ᦅᦹᧆ ᦺᦔ ᦠᦹᧂ ᦍᦱᧁᧈ 。 ᦑᧂ ᦶᦉᧃᧈ ᦶᦏᧄ ᦺᦞ ᦑᦳᧃᧉ ᦍᦴᧉ ᦵᦵᦎᧂᧈ ᦵᦵᦙ ᦑᦲᧈ ᦵᦃᧆ ᦋᦱ ᦐᦸᧂ ᦃᧂ ᦓᧄᧉ ᦓᦱ ᦋᦱᧉ ᦷᦆᧉ、 ᦐᦸᧂ ᦃᧂ ᦓᧄᧉ ᦠᦽᧉ ᦌᦲᧂ ᦷᦆᧉ; ᦶᦏᧄ ᦺᦞ ᦑᦳᧃᧉ ᦍᦴᧉ ᦂᦱᧃ ᦠᦱᧂᧉ ᦵᦵᦣᧃ ᦉᦱᧂᧉ ᦵᦵᦎᧂᧈ ᦐᦸᧂ ᦃᧂ ᦓᧄᧉ ᦠᦽᧉ ᦜᦲᧈ ᦷᦆᧉ、 ᦐᦸᧂ ᦃᧂ ᦓᧄᧉ ᦢᦱᧃᧉ ᦋᦱᧂᧉ、 ᦐᦸᧂ ᦃᧂ ᦓᧄᧉ ᦶᦒᧃᧉ ᦝᦱᧂᧉ; ᦶᦏᧄ ᦺᦞ ᦶᦎᧂᧈ ᦶᦙ ᦋᦸᧂᧈ ᦂᦱᧃ ᦶᦍᧂᧈ ᦺᦋᧉ ᦓᧄᧉ ᦃᦱᧂᧈ ᦓᧄᧉ ᦺᦉᧈ ᦓᦱ ᦵᦙᦲᧂ ᦘᦳᧂ, ᦁᦱ ᦙ ᦃᦱᧄᧈ ᦷᦆᧄᧈ ᦑᦲᧈ ᦅᧁᧉ ᦵᦣᧆ ᦉᦱᧂᧉ ᦖᦱᧅ ᦃᧁᧉ ᦵᦙᧆ ᦓᧄᧉ ᦅᦳᧂᧈ ᦙᦲ ᦓᧄᧉ ᦖᧃᧉ ᦞᦹᧃ; ᦑᦽ ᦎᦱᧄ ᦟ ᦶᦢᧇᧈ ᦋᧁᧈ ᦠᦱ ᦵᦞᧅ ᦂᦱᧃ ᦃᦱᧂᧈ ᦓᧄᧉ ᦺᦉᧈ ᦓᦱ ᦋᦰ ᦔᦱᧃ ᦂᦱᧂ ᦵᦙᦲᧂ ᦟᦱᧉ, ᦔᦸᧂ ᦠᦹᧉ ᦺᦡᧉ ᦉᦱᧂᧉ ᦵᦵᦎᧂᧈ ᦵᦙᦲᧈ ᦋᧁᧉ, ᦀᦸᧅᧈ ᦶᦣᧂ ᦵᦣᧆ ᦂᦱᧃ ᦠᦱᧂᧉ ᦵᦵᦣᧃ ᦶᦎᧂᧈ ᦶᦙ ᦋᦸᧂᧈ ᦂᦱᧃ ᦃᦱᧂᧈ ᦓᧄᧉ ᦺᦉᧈ ᦓᦱ ᦵᦙᦲᧂ ᦷᦊᧃᧈ ᦠᦹᧉ ᦡᦲ 。 ᦶᦏᧄ ᦙᦱ, ᦵᦙᦲᧂ ᦘᦳᧂ ᦵᦈᦲᧃᧈ ᦃᦸᧅ ᦣᦸᧂᧈ ᦟᦱᧂ ᦵᦖᦲᧂ ᦵᦕᧁᧉ ᦷᦖᧆ ᦜᦳᧄᧈ ᦷᦜᧉ ᦣᦸᧂᧈ ᦷᦜᧂ ᦎᦱᧈ ᦌᦴᧈ ᦋᦸᧉ ᦗᧃ ᧘ ᦣᦾᧉ ᦙᦲ, ᦗᦸᧈ ᦺᦣᧈ ᦶᦙᧈ ᦓᦱ ᦋᦳᧄ ᦜᦻ ᦢᦱᧃᧉ ᦵᦉᧁᧉ ᦎᦱᧄ ᦷᦎ ᦋᦳ ᦓᦳᧄ ᦵᦕᧁᧉ ᦜᦳᧄᧈ ᦷᦜᧉ ᦗᧃ ᧕ ᦣᦾᧉ ᦙᦲ, ᦁᧄ ᦗᧅ ᦣᧅ ᦉᦱ ᦣᦸᧂᧈ ᦵᦖᦲᧂ ᦷᦜᧂ ᦅᦳᧂᧈ ᦓᧄᧉ ᦟᦳᧂᧈ ᦡᦲ; ᦢᦱᧃᧉ ᦀᦲᦰ ᦗᦲ ᦌᦳᧃᧈ ᦞᦼ ᦃᦼᧈ ᦀᦲᦰ ᦇᦴ ᦵᦈᦲᧃᧈ、 ᦅᦳᧂᧈ ᦌᦱᧂ ᦢᦱᧃᧉ ᦵᦙᦲᧂ ᦂᦸᧃ ᦵᦟᧀ ᦎᦱᧄ ᦷᦎ ᦣᦸᧄ ᦇᦹᧃ ᦃᧆ ᦎᦸᧈ ᦝᦱᧉ ᦶᦟᧂᧉ ᦶᦠᧂᧉ ᦃᦱᧃᧈ。

  ᦶᦕᧈ ᦉᦸᧃ ᦍᦸᦰ ᦓᧄ, ᦺᦘᧈ ᦑᧂ ᦂᦳᧄ ᦃᧆ ᦎᦸᧈ ᦝᦱᧉ ᦶᦟᧂᧉ ᦶᦠᧂᧉ ᦃᦱᧃᧈ。 ᦆᦸᧂᧉ ᦔᦱᧃᧈ ᦂᦱᧃ ᦷᦣᧂ ᦋᦲᧉ ᦓᧄ ᦃᧆ ᦎᦸᧈ ᦝᦱᧉ ᦶᦟᧂᧉ ᦶᦠᧂᧉ ᦃᦱᧃᧈ ᦝᦱᧂᧉ ᦓᧄᧉ ᦷᦏᧄᧉ ᦓᧄᧉ ᦓᦸᧂ ᦺᦓ ᦶᦉᧃᧈ ᦃᧅ ᦖᧃᧈ ᦉᦹᧇᧈ ᦠᦱ ᦅᧁᧉ ᦂᦱᧂ ᦺᦈ ᦉᦲᧂᧈ ᦃᦱᧁᧈ ᦺᦓ ᦶᦉᧃᧈ, ᦗᦹᧂᧈ ᦂᧇ ᦶᦎᧃᧈ ᦉᦹᧈ ᦒᦻᧉ ᦵᦙᦲᧂ ᦟᦱᧉ、 ᦅᦳᧂᧈ ᦈᦳᧂᧈ ᦵᦞᧀᧈ ᦉᦲᧃᧈ ᦃᦱᧁᧈ “ᦵᦙᦲᧂ ᦟᦱᧉ ᦝᦱᧉ ᦔᦴᧈ” ,  App “ᦌᦳᧃᧉ ᦉᦼᧈ ᦵᦙᦲᧂ ᦟᦱᧉ” ᦚᦳᧂ ᦓᦲᦰ ᦶᦕᧈ ᦉᦸᧃ ᦂᦱᧃ ᦃᧆ ᦎᦸᧈ ᦝᦱᧉ ᦶᦟᧂᧉ ᦶᦠᧂᧉ ᦃᦱᧃᧈ、 ᦩᦱᧄ ᦣᦴᧉ ᦶᦍᧂᧈ ᦺᦋᧉ ᦓᧄᧉ, ᦂᦻ ᦔᦲᧃ ᦵᦟᦲᧂᧈ ᦵᦔᦲᧂ ᦺᦘᧈ ᦑᧂ ᦂᦳᧄ ᦃᧆ ᦎᦸᧈ ᦝᦱᧉ ᦶᦟᧂᧉ ᦶᦠᧂᧈ ᦃᦱᧃᧈ ᦓᧃᧉ。  

  (ᦙᦲᧃᧉ ᦵᦑᦲᧉ、 ᦩᦱᧂᧉ ᦈᦲᧃᧈ)